2025 жылғы 13 маусымда Астанада Қырғыз Республикасы Сыртқы істер министрінің бірінші орынбасары Асеин Исаев пен Қазақстан Республикасы Сыртқы істер министрінің орынбасары Ермұхамбет Қоныспаевтың төрағалығымен екіжақты ынтымақтастық және өңірлік өзара іс-қимыл мәселелері бойынша саяси консультациялар өтті.

Тараптар саяси, сауда-экономикалық, су-энергетика, көлік-транзит, мәдени-гуманитарлық және басқа да салалардағы қырғыз-қазақ қатынастарының өзекті мәселелерін егжей-тегжейлі талқылады. Сондай-ақ екі елдің халықаралық және өңірлік ұйымдар аясындағы өзара іс-қимылы жөнінде пікір алмасылды. Қырғызстан азаматтарының Қазақстанда болу шарттарына қатысты мәселелер қозғалды.

Бұл ретте Қазақстан Республикасының Президенті Қасым-Жомарт Тоқаевтың Қырғыз Республикасына ресми сапарына дайындық мәселелеріне, сондай-ақ Қырғызстан мен Қазақстанның мемлекет, үкімет басшылары және сыртқы істер органдары деңгейінде қол жеткізілген уағдаластықтарды іске асыру мәселелеріне ерекше назар аударылды.

Консультациялардың қорытындысы бойынша Қазақстан Республикасының Президенті Қ.Тоқаевтың Қырғыз Республикасына ресми сапарына дайындық жөніндегі Жол картасына қол қойылды.