Алматы, 30 сәуір 2025 жыл – Караван Инфо ақпараттық агенттігі.Әл-Фараби атындағы Қазақ ұлттық университетінің Дәрілік өсімдіктерді зерттеу орталығында Қазақстан-Қытай салауатты тамақтануды зерттеу орталығының ашылуы өтті. Ашылу салтанатына ҚазҰУ-дың басқарма төрағасы және ректоры Жансейіт Түймебаев пен Бейжің технология және бизнес университетінің тағамтану және денсаулық факультетінің профессоры Лю Синци қатысты.

Жансейіт Түймебаевтың айтуынша, жаңа ғылыми орталық Қазақстанда өсетін дәрілік өсімдіктерді терең зерттеуге, соның ішінде сояның қасиеттері мен құрамын талдауға мүмкіндік береді. Зерттеудің нәтижесі соя негізінде пайдалы тағам түрлерін жасау болады. Ректор сонымен қатар ҚазҰУ мен Қытайдың 60-қа жуық жоғары оқу орындарының тығыз байланысын атап өтіп, бірлескен ғылыми жобалар, оқытушылар мен студенттер алмасу, бірлескен ғылыми іс-шаралар өткізу аясында Бейжің технология және бизнес университетімен ынтымақтастықты нығайтуға ниетті екенін жеткізді.

Профессор Лю Синци ҚазҰУ басшылығына жылы қарсы алғаны үшін алғысын білдіріп, өз университетінің қан қысымын реттейтін, асқазан-ішек жолдарын тазартатын және энергияны арттыратын қасиеттері бар соядан пайдалы тағам өнімдерін жасау саласындағы ғылыми-инновациялық әзірлемелеріне тоқталды. Ол бұл өнімдерді Қазақстан нарығына жеткізуге қызығушылық танытып, ашық орталықтың мақсаты Қазақстанда өсетін соя және басқа да пайдалы өсімдіктерді жан-жақты зерттеу екенін атап өтті.

Келіссөздер барысында екі университет өкілдері салауатты тамақтану және табиғи ресурстарды пайдалану саласындағы бірлескен зерттеулердің жаңа перспективаларын ашатын ғалымдар арасындағы әріптестікті нығайту және ынтымақтастықты дамыту жөнінде пікір алмасты.

Фото: Қазақстан Республикасы Ғылым және жоғары білім министрлігі