Қазақстан Премьер-Министрінің орынбасары және сыртқы істер министрі Мұрат Нұртілеу Арменияның Қазақстандағы Елшісі Армен Гевондянға Қазақстан Республикасының мемлекеттік наградасы – II дәрежелі «Достық» орденін табыс етті. Марапаттау рәсімі Қазақстанның Сыртқы істер министрлігінде өтті.

Нұртілеу өз сөзінде Армения Елшісінің Қазақстан мен Армения арасындағы достық қатынастар мен көпжақты ынтымақтастықты дамытуға қосқан елеулі үлесін атап өтті. Ол сондай-ақ армян дипломатының екі ел арасындағы байланысты нығайтудағы одан әрі жетістіктеріне үміт білдірді.

Кездесу барысында Министр Қазақстан Президенті Қасым-Жомарт Тоқаевтың ағымдағы жылдың 14-15 сәуірінде өткен Ереванға жасаған алғашқы ресми сапарының қорытындысы бойынша жоғары деңгейде қол жеткізілген уағдаластықтарды іске асырудың маңыздылығын атап өтті.

Жауап сөзінде Армен Гевондян Қазақстан басшылығына оның жұмысына жоғары баға бергені үшін терең ризашылығын білдіріп, достық пен ынтымақтастық негізінде қазақ-армян өзара іс-қимылын дамытуға белсенді түрде жәрдемдесуді жалғастыруға дайын екендігін растады.

Қазақстан мен Армения биыл 1999 жылғы 2 қыркүйекте жасалған достық және ынтымақтастық туралы шартқа қол қойылғанына 25 жыл толуын атап өтті. Осы күнге орай екі мемлекеттің басшылары мен сыртқы саяси ведомстволардың басшылары арасында құттықтау жолдауларымен алмасу өтті

Фото:  ҚР СІМ