Астана, 28 мамыр 2025 жыл – Караван Инфо ақпараттық агенттігі.Астанада Қазақстан Республикасы Сыртқы істер министрінің бірінші орынбасары Ақан Рахметуллин мен БҰҰ Бас хатшысының Ауғанстан бойынша Арнайы өкілі – БҰҰ-ның Ауғанстанға көмек көрсету миссиясының (UNAMA) басшысы Роза Отынбаеваның кездесуі өтті.

Отынбаева Қазақстанға 2025 жылғы 29-30 мамырда өтетін Астана халықаралық форумына қатысу үшін келді. Кездесуге БҰҰ Есірткі және қылмыс жөніндегі басқармасының (UNODC) Ауғанстан, Орталық Азия, Иран және Пәкістан бойынша аймақтық өкілі Оливер Столпе де қатысты.

Тараптар Ауғанстандағы тұрақтылық пен тұрақты дамуды ілгерілетуде Қазақстанның UNAMA және UNODC-пен өзара іс-қимылына қатысты мәселелердің кең ауқымын талқылады. Денсаулық сақтау, білім беру, инфрақұрылым және жұмыспен қамту сияқты салаларға назар аударылды.

Әлеуетті бірлескен жобалар, сондай-ақ Алматыда БҰҰ-ның Орталық Азия мен Ауғанстанның орнықты даму мақсаттарының өңірлік орталығының ашылуы аясында да қарастырылды.

Қазақстанның Ауғанстанға тұрақты түрде гуманитарлық қолдау көрсетіп отырғаны ерекше атап өтілді. Бұл көмек азық-түлікпен, қажетті заттармен және дәрі-дәрмекпен қамтамасыз етуді, сондай-ақ білім беру бастамаларын қолдауды қамтиды.

Фото:Қазақстан Республикасының СІМ