Қазақстан Республикасы Сыртқы істер министрінің бірінші орынбасары Ақан Рахметуллин БҰҰ Бас хатшысының орынбасары және БҰҰ Азия және Тынық мұхиты үшін экономикалық және әлеуметтік комиссиясының (ЭСКАТО) атқарушы хатшысы Армида Алисжабанамен кездесу өткізді. Кездесу Алисжабананың 2024 жылғы 3-5 қыркүйекте өтетін цифрлық инклюзия және трансформация жөніндегі Азия-Тынық мұхиты министрлік конференциясына қатысу үшін Астанаға сапары аясында өтті.

Талқылаудың негізгі тақырыбы Алматыда БҰҰ ЭСКАТО цифрлық шешімдер орталығын құру жөніндегі қазақстандық бастаманы қоса алғанда, бірлескен жобалардың болашағы болды. Бұл орталық әріптес елдер арасында инновациялық технологиялар саласында тәжірибе алмасу платформасына айналады деп болжануда.

Ақан Рахматуллин Қазақстан комиссияға мүше басқа мемлекеттермен алмасу және енгізу үшін 20-дан астам цифрлық шешімдерді ұсынуға дайын екенін атап өтті. Сондай-ақ, көліктік-логистикалық байланыстарды дамыту және өңірлік ауқымда экспорттық транзиттік маршруттарды әртараптандыру мәселелеріне ерекше назар аударылды.

Армида Алисжабана Қазақстанның өңір елдері арасындағы цифрлық саладағы ынтымақтастықты нығайтудағы күш-жігерін жоғары бағалады. Ол сондай-ақ елдің Еуразиялық кеңістіктегі транзиттік әлеуетті дамытуға қосқан елеулі үлесін атап өтті.

Конференция барысында цифрлық технологиялардың тұрақты дамуға, теңсіздікті азайтуға және адамдардың мүмкіндіктерін кеңейтуге қалай ықпал ететіні талқыланды. Іс-шараға цифрлық технологиялар министрлері, халықаралық ұйымдардың өкілдері мен өңірдің сарапшылары қатысты.

Фото: ҚР СІМ