Париж, 29 мамыр, 2025 жыл – Karavan Info ақпараттық агенттігі.Дүниежүзілік жануарлар денсаулығы ұйымының 92-ші Бас Ассамблеясы аясында Қазақстан Республикасының өкілдері мен Болгарияның Ұлттық ветеринариялық қызметінің басшысы Илья Костов арасында жұмыс кездесуі өтті. Келіссөздер барысында тараптар ветеринария және асыл тұқымды мал шаруашылығы саласындағы екіжақты ынтымақтастықтың негізгі бағыттарын талқылады.

Еуропалық Одақ елдерінен асыл тұқымды сүтті ірі қара малын әкелуді көздейтін Қазақстанның өнеркәсіптік сүт фермаларын дамыту бағдарламасын жүзеге асыруға ерекше назар аударылды.

Аусыл және көк тілдің ошақтарын тіркеуге байланысты қазіргі эпизоотиялық жағдайды, сондай-ақ бірқатар карантиндік орындардың, соның ішінде Венгрияда екі пункттің жабылуын ескере отырып, тұрақты жеткізуді қамтамасыз ету үшін жаңа логистикалық шешімдерді табу қажеттілігі туындады.

Қазақстандық тарап Болгария аумағында ЕО-ның да, Қазақстан Республикасының да ветеринариялық талаптарына сәйкес келетін сертификатталған карантиндік учаскені ашу мүмкіндігін қарастыруды ұсынды.

Одан бөлек, кездесуде асыл тұқымды малды теңіз арқылы тасымалдауды жүзеге асыру үшін Болгар теңіз портын сертификаттау перспективасы талқыланды.

Фото:Қазақстан Республикасы Ауыл шаруашылығы министрлігі