Үрімші, 15 мамыр, 2025 жыл – Караван Инфо ақпараттық агенттігі.Үрімжіде Шанхай ынтымақтастық ұйымына мүше мемлекеттердің білім министрлерінің 9-шы отырысы өтіп, оған Қазақстан Республикасының Білім министрі Ғани Бейсембаев қатысты. Кездесуде ШЫҰ елдері арасындағы білім беру саласындағы ынтымақтастықты дамытудың негізгі бағыттары, оның ішінде білікті кадрларды даярлау, бірлескен академиялық бастамалар, цифрлық трансформация және білім беру үдерісіне жасанды интеллект енгізу мәселелері талқыланды.

Министр Ғани Бейсембаев өз сөзінде техникалық және кәсіптік білім беру саласындағы әріптестікті нығайтудың стратегиялық маңыздылығын ерекше атап өтті. Оның айтуынша, бұл ынтымақтастықтың негізгі элементтері студенттер мен оқытушылардың академиялық ұтқырлығын дамыту, бірлескен білім беру бағдарламаларын енгізу және еңбек нарығының заманауи талаптарына жауап беретін мамандарды дайындау сапасын арттырудың тиімді құралы ретінде колледждерді интернационалдандыру болып табылады.

Сондай-ақ іс-шара аясында Қазақстанның Білім министрі мен оның қытайлық әріптесі Хуай Цзиньпэннің екіжақты кездесуі өтті. Кездесу барысында екіжақты ынтымақтастық және техникалық және кәсіптік білім беру саласындағы тәжірибе алмасу мәселелері талқыланды. Бүгінде Алматы, Шымкент және Жамбыл облысындағы колледждер қазірдің өзінде Қытайдың жетекші колледждерімен және өндірістік кластерлерімен белсенді өзара әрекеттесіп, студенттер мен оқытушылардың озық технологиялар мен өндіріс стандарттарын меңгеру үшін тағылымдамадан өтуін ұйымдастыруда.

Нәтижелі келіссөздердің нәтижесінде халықаралық біліктілігі бар мамандарды даярлауда флагманға айналуды көздейтін бірлескен Қазақстан-Қытай кәсіптік-техникалық колледжін құру туралы келісімдерге қол жеткізілді. Сондай-ақ Қытай тарапы қазақстандық білім беру ұйымдарының басқарушы қызметкерлерінің жасанды интеллект және білім беруді цифрландыру саласындағы біліктілігін арттыруға жәрдемдесуге дайын екенін білдірді. Сонымен қатар, тараптар биыл күзде Алматыда өтетін Инклюзивті білім беру жөніндегі Бірінші Дүниежүзілік конгресс аясында ынтымақтастық туралы меморандумға қол қою ниетін растады.

Фото: Қазақстан Республикасы Білім министрлігі