Ташкент, 24 қыркүйек 2025 жыл – Karavan Info ақпараттық агенттігі.Қазақстан Өзбекстанмен және Орталық Азияның басқа да елдерімен сыртқы экономикалық ынтымақтастығын одан әрі кеңейтуді күтеді. Бұл туралы «Азық-түлік келісім шарт корпорациясы» ҰК» АҚ басқарма төрағасының орынбасары Самат Тенбаев Ташкентте өткен Asia Grains & Oils 2025 конференциясында айтты.

Конференцияда Қазақстанның егістік алқаптарын әртараптандырып жатқаны айтылды. 2030 жылға дейінгі мемлекеттік бағдарлама аясында суды көп қажет ететін бидайдың үлесі майлы, бұршақ және мал азықтық дақылдар пайдасына азайтылуда. Биылдың өзінде Өзбекстанға және аймақтағы басқа елдерге күнбағыс тұқымын жөнелту айтарлықтай өсті.

Конференцияға қатысушылар Ақмола, Жамбыл облыстарында және Астанада жүзеге асырылып жатқан астық өңдеудің озық жобаларына үлкен қызығушылық танытты. Азық-түлік келісім шарт корпорациясы мұндай бастамаларды жүзеге асыруға ықпал етуге дайын.

Азық-түлік келісім шарт корпорациясы өкілінің айтуынша, Қазақстан егін жинау бойынша қолайлы болжамдардың арқасында экспорттық әлеуетін нығайта бермек. 2025 жылдың алғашқы сегіз айында ел шамамен 12,8 миллион тонна астық экспорттады. Бұл ретте 360 мың тонна бидайды, тағы 453 мың 300 тоннаны саудагерлер арқылы тікелей экспортқа шығарған «Азық-түлік келісім шарт корпорациясы» маңызды рөл атқарды. Нәтижесінде компанияның жалпы ұлттық астық экспортындағы үлесі 8,9%-ға жетті.

Конференцияға Өзбекстан мен АҚШ Ауыл шаруашылығы министрліктерінің, Ресей және Қытай корпорацияларының өкілдері қатысты.

Фото:Қазақстан Республикасы Ауыл шаруашылығы министрлігі