Астана, 25 сәуір 2025 жыл – Караван Инфо ақпараттық агенттігі.Қазақстан Республикасы Денсаулық сақтау министрлігі Қазақстан Республикасы Білім министрлігімен және Қазақ тағамтану академиясымен бірлесіп, ЮНИСЕФ қолдауымен еліміздің білім беру ұйымдарында мектептегі тамақтанудың жаңа стандартын енгізуге арналған дөңгелек үстел өткізді. Іс-шараға мемлекеттік органдардың, денсаулық сақтау және білім беру жүйесінің, бизнестің өкілдері, сондай-ақ отандық және халықаралық сарапшылар қатысты.

Денсаулық сақтау министрі Ақмарал Әлназарова мектептегі сапалы және қауіпсіз тамақтандырудың болашақ ұрпақ денсаулығы үшін стратегиялық маңыздылығына тоқталып, жаңа тәсілді тиімді енгізу үшін барлық мүдделі тараптардың күш-жігерін үйлестіру қажеттігін атап өтті. Мемлекет басшысы бұған дейін 1 миллион 700 мың оқушыны қамтитын мектептегі тегін тамақтандыру сапасын арттыру қажеттігіне назар аударып, халықаралық стандарттарға сай болуының маңыздылығына тоқталған болатын.

Денсаулық сақтау министрлігі Білім министрлігімен, отандық және халықаралық сарапшылармен бірлесіп ғылыми көзқарастар мен халықаралық ұсынымдар негізінде әзірлеген жаңа Мектептегі тамақтану стандарты Қазақстанның барлық білім беру ұйымдарында 2025 жылдың 1 қыркүйегінен бастап күшіне енеді.

Қазақ тағамтану академиясының президенті Алмаз Шарман жаңа стандарт талаптарын қатаң сақтау балалардағы семіздік, 2 типті қант диабеті, артериялық гипертензия және басқа да созылмалы аурулар көрсеткіштерінің айтарлықтай төмендеуіне ықпал ететінін айтты. Стандартты енгізу өнімдердің сапасына және мектеп тамақтандыру объектілерінің санитарлық жағдайына бақылауды күшейтумен, сондай-ақ дайындалған тағамның сапасын бағалаудағы мектеп медбикелерінің рөлін кеңейтумен қатар жүретін болады. Қазақстан Республикасы Денсаулық сақтау министрлігі Санитарлық-эпидемиологиялық бақылау комитеті төрағасының орынбасары Нұрқан Сәдуақасов мемлекеттік бақылауды күшейту, оның ішінде тексерулер туралы алдын ала хабарлауды жою және тұрақты мониторингтік баруларды енгізу туралы баяндады.

Фото:Қазақстан Республикасы Денсаулық сақтау министрлігі