Астана, 2025 жылғы 3 маусым – «Караван Инфо» ақпараттық агенттігі.Астанада Қазақстан Республикасы Энергетика министрлігі Атомдық және энергетикалық қадағалау мен бақылау комитетінің кеңейтілген отырысы өтті.

Шараға барлық аумақтық басқармалардың басшылары қатысты. Отырыстың негізгі мақсаты – басқармалардың 2024 жылға арналған қызметін қорытындылау, негізгі нәтижелерді талқылау, түйткілді мәселелерді анықтау және болашақтағы жұмыстың басым бағыттарын айқындау.

Алқа отырысы барысында Комитет қызметінің жалпы стратегиялық бағыттары да, жергілікті деңгейдегі жұмыс тиімділігінің нақты көрсеткіштері де қарастырылды. Комитет төрағасы «Алқа форматы бізге қорытынды шығаруға ғана емес, өңірлерді тыңдауға, бастамаларды талқылауға және таяу болашаққа арналған нақты қадамдарды белгілеуге мүмкіндік берді» деп атап өтті.

Сондай-ақ іс-шарада Қазақстан Республикасы Энергетика министрлігінің Әдеп жөніндегі уәкілінің баяндамасы тыңдалды, ол мемлекеттік қызмет пен мемлекеттік сектордағы жұмыстың құрамдас бөлігі болып табылатын кәсіби этиканың маңызды аспектілеріне тоқталды.

Сонымен қатар, ҚР Президенті жанындағы Мемлекеттік басқару академиясының Ұлттық мемлекеттік саясат мектебінің доценті «Тиімді коммуникациялар» тақырыбында семинар өткізді.

Отырыс қорытындысы бойынша аумақтық департаменттер қызметінің тиімділігін арттыруға бағытталған бірлескен шешімдер әзірленді.

Фото:Қазақстан Республикасы Энергетика министрлігі