Премьер-Министр Олжас Бектеновтың төрағалығымен өткен Үкімет отырысында кірістер мен мүлікті жалпыға бірдей декларациялау мәселесі қаралды. Қаржы министрі Мәди Такиев жүйеге 4,8 миллион адам, оның ішінде мемлекеттік қызметкерлер, коммерциялық ұйымдардың құрылтайшылары мен олардың жұбайлары кіргенін айтты.

Қалған 8 млн азамат — жеке сектор қызметкерлері, зейнеткерлер, үй шаруасындағы әйелдер мен студенттер үшін-деректер базасын цифрландыруды және қолма-қол ақшасыз төлемдерді дамытуды ескере отырып, міндетті декларациялаудан босату ұсынылды. Декларациялау шетелдік активтері, ірі сатып алулары 74 млн теңгеден асатын және дербес салық салынатын табысы бар тұлғалар үшін ғана сақталады.

Азаматтарға ерікті түрде декларациялау құқығы беріледі. Мұндай шешім осы санаттағы жеке тұлғалардың 90% — дан астамына әсер етіп, халыққа әкімшілік жүктемені азайтады.

Премьер-министр бұл бастаманы қолдап, бейінді министрліктерге үш күн мерзімде Парламентке енгізу үшін қажетті заңнамалық түзетулер дайындауды тапсырды. Бектенов цифрландыру мен қаржылық бақылауды күшейтудің арқасында мемлекеттік органдарда салық мониторингі үшін барлық қажетті ақпарат бар екенін атап өтті.

Фото: freepik.com