Қырғызстан Олимпиада құрамасына (U-23) жаңа бас бапкер келді. Қырғызстан футбол одағының шешімімен бұл орынға UEFA PRO лицензиясы бар бразилиялық маман Эдмар Ласерда келді.

Ласерда бұған дейін бразилиялық «Индепендиенте», «Паулиста» және «Интернасьональ» клубтарында кәсіби футболшы ретінде ойнаған. 2003 жылы Украинаға көшіп, мансабын «Таврия», «Металлист», «Днепр» сияқты клубтарда жалғастырды.

Украина азаматтығын алған Эдмар 2011-2014 жылдар аралығында Украина құрамасында ойнаған.

Бапкерлік мансабын 2019 жылы бастады. 2023 жылға дейін «Металлист 1925» клубында, 2024 жылы қазақстандық «Тобыл» клубында жаттықтырушының көмекшісі болды.

Ласерда биылғы жылдың қыркүйек айында өтетін Азия кубогының іріктеу кезеңінде ұлттық құраманы басқарады деп күтілуде.