Өткен дөңгелек үстелде ҚР Еңбек және халықты әлеуметтік қорғау министрлігінің өкілдері балалы отбасыларды қолдау шаралары туралы айтып берді.

Еңбекмині әлеуметтік көмек департаменті басқармасының басшысы Гүлмира Жәкенқызының айтуынша, Қазақстанда отбасыларды әлеуметтік қолдаудың көп деңгейлі жүйесі жұмыс істейді.Балалары бар отбасылар республикалық бюджеттен де, мемлекеттік әлеуметтік сақтандыру қорынан да түрлі жәрдемақы алады.

Биыл балалы отбасыларды әлеуметтік қолдауға 1,6 трлн теңгеден астам қаражат бөлу жоспарлануда. Бұл қаражат баланың тууына, бала күтіміне, көп балалы отбасыларға, сондай-ақ жүктілік пен босануға байланысты табысынан айырылу жағдайына байланысты әлеуметтік төлемдерге жұмсалады.

Көпбалалы отбасыларды қолдауға ерекше көңіл бөлінеді. Мұндай отбасыларға арналған жәрдемақылардың мөлшері балалардың санына байланысты және айтарлықтай мөлшерге жетуі мүмкін. Бұдан басқа, «Алтын алқа» және «Күміс алқа» алқаларымен марапатталған көп балалы аналар өмір бойы ай сайынғы мемлекеттік жәрдемақы алады.

Фото: ҚР Президенті жанындағы ОКҚ