2025 жылғы 16 шілдеде Денсаулық сақтау министрінің цифрлық даму жөніндегі орынбасары Нұргүл Әднаева Ұлттық госпитальдің дәріхана бөлімінде болып, дәрілік заттарды қадағалау жүйесін енгізу барысымен танысты.

Сапар барысында дәрілік заттардың қозғалысын есепке алу және бақылау, сондай-ақ 1С бағдарламасының дәріхана модулін дәрілік заттардың электронды базасымен біріктіру мәселелеріне ерекше назар аударылды. Бақылау жүйесі дәрілік заттарды басқарудың ашықтығы мен тиімділігін арттыруға, пациенттерді сапалы және қауіпсіз дәрі-дәрмекпен қамтамасыз етуге, медициналық мекемелерге жалған және сапасыз дәрілік заттардың ағынының алдын алуға бағытталған.

Денсаулық сақтау министрлігінің хабарлауынша, бұл жүйені Дәрілік заттар және медициналық бұйымдар департаменті медициналық және фармацевтикалық ұйымдармен бірлесіп, басқа да мемлекеттік органдардың қатысуымен енгізуде. Ол дәрі-дәрмектің барлық жолын қамтиды: өндірушіден соңғы тұтынушыға дейін.

Денсаулық сақтау министрлігі азаматтардың денсаулығын сақтауға және денсаулық сақтау жүйесіне сенімді нығайтуға бағытталған заманауи бақылау тетіктерін енгізе отырып, фармацевтика саласын цифрландыру бойынша белсенді жұмысты жалғастыруда.