Астана, 2025 жылғы 7 маусым – Караван Инфо ақпараттық агенттігі.Қазақстан Республикасының Ұлттық музейінде Домбыра күні мен көрнекті композитор, дирижер, Қазақстанның халық әртісі Нұрғиса Тілендиевтің туғанына 100 жыл толуына орай «Күмбірле, қоңыр домбыра!» атты мерекелік кеш өтті.

Кештің басты мақсаты – жас ұрпақтың бойына ұлттық болмыстың жарқын символы ретіндегі домбыраға деген сүйіспеншілікті ояту, күй өнерінің ұлы мұрасын, сондай-ақ Нұрғиса Тілендиевтің шығармашылық жолын кеңінен насихаттау.

Мерекелік кеште ұлттық музыка өнерінің озық үлгілері көрермен назарына ұсынылды. Белгілі күйші-домбырашылар Нұрғиса Тілендиевтің өмірі мен шығармашылығы туралы жылы естеліктерімен бөлісті. Олардың ойынша, домбыра – жай музыкалық аспап емес, ұлттың үні, ата-баба өсиеті.

Шараға «Дәстүр» фольклорлық ансамблінің әртістері, No1 балалар саз мектебінің оқушылары, «Күмбір» домбыра үйрену орталығының тәрбиеленушілері және жас таланттар қатысты. Олар күйлер мен халық әндерін шебер орындап, шынайы қошеметке бөленіп, залда ерекше көңіл-күй сыйлады.

Фото: ҚР Мәдениет және ақпарат министрлігінің баспасөз қызметі