Шавкат Мирзиёев республиканың Дүниежүзілік сауда ұйымына (ДСҰ) кіру мәселелері бойынша қалған тоғыз елмен екіжақты келіссөздерді ағымдағы жылдың соңына дейін аяқтауды тапсырды. Айта кетейік, 2023 жылдан бері Өзбекстанның ДСҰ-ға кіруі бойынша Жұмыс тобының төрт отырысы өтіп, онда 500-ден астам мәселе қаралды. 33 елмен нарыққа шығу бойынша келіссөздер жүргізіліп, оның 24-і сәтті аяқталды. Ұлттық заңнаманы ДСҰ талаптарына сәйкестендіру аясында 13 заң, 10 жарлық пен Президенттің қаулысы, сондай-ақ басқа да нормативтік құқықтық актілер қабылданды.

«Осы жылдың соңына дейін қалған 9 елмен екіжақты келіссөздерді аяқтау, жұмыс тобының тағы екі отырысын өткізу және жұмыс тобының қорытынды баяндамасының жобасын дайындауды аяқтау, осылайша Өзбекстанның ДСҰ аясындағы халықаралық міндеттемелерін қамтамасыз ету тапсырылды», — деді ол.— делінген мемлекет басшысының баспасөз қызметі таратқан хабарламада.

Сондай-ақ Президент 15-ке жуық нормативтік құқықтық актіні қабылдауды жеделдету қажеттігін атап өтті. Олардың қатарында Олий Мажлистің Заң шығару палатасымен тығыз байланыста «Азық-түлік өнімдерінің сапасы мен қауіпсіздігі туралы» және «Қорғау шаралары, демпингке қарсы және өтемақы баждары туралы» заңдардың жаңа редакциясын әзірлеу бар. Техникалық реттеу, санитарлық, фитосанитарлық және ветеринарлық салалардағы реформалардың маңыздылығына, сондай-ақ осы салалардағы кадрларды даярлау сапасын арттыруға ерекше назар аударылды. Өзбекстан ДСҰ-ға кіруге 1994 жылы өтініш берді және 2026 жылы Камерунда өтетін 14-ші ДСҰ министрлер конференциясына дейін кіру процесін аяқтауды жоспарлап отыр.