Президент Садыр Жапаров бүгін, 5 мамырда Қырғызстан халқын Қырғыз Республикасының Конституция күнімен құттықтады.

Мемлекет басшысының құттықтауы:

«Құрметті Қырғызстан халқы!

Сіздерді Қырғыз Республикасының Конституция күнімен шын жүректен құттықтаймын!

5 мамыр Ата Заңымыздың қабылданған күні ғана емес, қашанда әділдікті жақтаған халқымыздың биік рухын, жарқын болашаққа деген берік сенімін еске салатын маңызды күн.

Өздеріңізге белгілі, Конституция жай ғана баптар жиынтығы емес, халқымыздың дүниетанымы мен ой-өрісін көрсететін, сонымен бірге қуатты, гүлденген Қырғызстанның болашағын айқындайтын басты құжат.

Біз бүгін Ата Заңымыздан шабыттана отырып, басқару, экономика немесе азаматтарды қолдау болсын, барлық салаға жаңа тәсілдер енгізе отырып, жаңа білімге, озық технологиялар мен тәжірибеге ұмтылудамыз. Бұл біздің айқын, батыл, дұрыс және лайықты жолмен келе жатқанымызды білдіреді.

Қырғыз халқы – өзгерістерден қорықпайтын, өзіне, еліне сенетін берекелі халық! Біз халқымыздың сан ғасырлық тарихын, бай мәдениеті мен құндылықтарын ешқашан ұмытпаймыз.

Ал бүгін біз қай жолмен жүру керектігін білеміз, еліміздің дамуына сенеміз.

Құрметті жерлестер!

Тағы да Қырғыз Республикасының Конституция күнімен құттықтаймын.

Конституция күні әділ және гүлденген Қырғызстанды құрудағы әрбір қадам мен әрбір шешімнің маңыздылығын әрқашан еске салсын.

Біздің Конституциямыз әрқашан шешімдеріміздің негізі болсын.

Мемлекетіміз нығая берсін, халықтың билікке сенімі артып, Қырғызстан жаңа белестерге сенімді түрде қадам бассын!»