Өз арнасында ақпаратпен бөліскен Мемлекеттік Дума спикері Вячеслав Володиннің айтуынша, мектептерге қабылдау науқаны сәуір айында басталған. Жаңа заңнамаға сәйкес, мигранттардың балалары Ресей Федерациясындағы оқу орындарына түсу үшін орыс тілінен емтихан тапсыруы керек. 10 түрлі аймақта барлығы 44 бала тестілеуге жіберілді, оның 27-сі сынақтан сәтті өтті.

Володин атап өткендей, Рособрнадзор мәліметтері бойынша тестілеуге кәмелетке толмаған шетелдік азаматтардан барлығы 1762 өтініш берілген. Алайда олардың 335-і ғана емтиханға жіберілсе, басым көпшілігі (81%) құжаттар мәселесіне байланысты сынақтан өте алмады.

"Кейбір құжаттарда жалған ақпарат болған, сондықтан көптеген балалардың құжаттарын қабылдаудан бас тартылды. 10 облыста 44 бала тестілеуге қатысты. Олардың тек 27-сі ғана тапсырманы сәтті орындады. Федералдық заңның орындалуының бұл аралық нәтижелері депутаттардың осы заңды әзірлеу және қолдау туралы шешімі дұрыс болғанын көрсетеді", — деді Володин.

2024 жылдың соңында қабылданған заң мигрант балаларды Ресей Федерациясында болу заңдылығын тексермей және емтихан арқылы орыс тілін жеткілікті деңгейде меңгергенін растамай, мектепке қабылдауға тыйым салады.