Душанбеде өткен Тәуелсіз Мемлекеттер Достастығының (ТМД) Үкімет басшылары кеңесінің отырысында ТМД-ның волонтерлік форумы туралы ереже ресми түрде бекітілді. Бұл туралы ТМД Атқару комитетінің баспасөз қызметі хабарлады.

Ережеге сәйкес, Форум тәжірибе алмасу, волонтерлік қозғалысты дамыту және халықаралық ынтымақтастықты нығайту үшін жыл сайынғы алаңға айналады. Шараны ұйымдастыру ТМД-ға қатысушы мемлекеттердің Жастар ісі жөніндегі кеңесіне жүктелді. Форум мемлекет атауларының орыс әліпбиінде белгіленген тәртіппен Достастық елдерінде кезекпен өтеді.

Форумды құру туралы бастаманы Қазақстан Президенті Қасым-Жомарт Тоқаев 2023 жылдың қазан айында ТМД Мемлекет басшылары кеңесінің отырысында ұсынған болатын. Жастар ісі жөніндегі кеңес бұл ұсынысты қолдап, форумды құру мәселесін үкімет басшыларының қарауына ұсынды.

Форумның негізгі міндеттеріне ТМД елдерінің волонтерлік ұйымдары арасында диалог пен өзара әрекеттесу алаңын құру, волонтерлердің қоғамдық өмірге қатысуын кеңейту, волонтерлік қызметтің беделін арттыру және осы саладағы табысты жобаларды ұсыну кіреді.