Өзбекстан мен Венгрияның білім саласындағы ынтымақтастығы жаңа деңгейге көтерілуде. Будапешттегі келіссөздер қорытындысы бойынша жыл сайын Өзбекстаннан 50 студент Венгрияның жетекші университеттерінің бірі Обуда университетіне оқуға жіберіледі.

Өзбекстан Жоғары білім, ғылым және инновация министрінің бірінші орынбасары Шохрух Далиев пен университет басшылығы арасындағы кездесуде академиялық алмасуды кеңейту, бірлескен бағдарламалар мен ғылыми зерттеулерді дамыту, профессорлық-оқытушылық кадрларды даярлау бойынша нақты қадамдар талқыланды.

Ынтымақтастықтың нақты механизмін құруға ерекше назар аударылуда: оқыту бағыттары, квоталар, қабылдау және қаржыландыру шарттары белгіленетін құжат әзірленуде.

«Венгриямен білім беру саласындағы әріптестік қазірдің өзінде нақты нәтиже көрсетуде. Біз ұзақ мерзімді, өзара тиімді ынтымақтастыққа ұмтыламыз– деп атап өтті Шохрух Далиев.

Бұл бастама Өзбекстан университеттерінің кадрлық әлеуетін нығайтуға қосымша серпін береді және жастардың жоғары сапалы еуропалық білім алуына жаңа перспективалар ашады.