Өзбекстан мен Түркия экономикалық ынтымақтастықты кеңейтіп, өзара тауар айналымын 5 миллиард долларға жеткізуді көздеп отыр. Бұл туралы Өзбекстанның Түркиядағы елшісі Ильхом Хайдаров пен Түркияның сауда министрі Өмер Болаттың кездесуінен кейін белгілі болды.

Анкарадағы кездесуде тараптар сауда-экономикалық және инвестициялық қарым-қатынастардың қазіргі жағдайы мен болашағын талқылады. Түркия министрі атап өткендей, 2024 жылы өзара тауар айналымының көлемі 3 млрд долларды құрады. Бұл ретте екі тарап та алдағы екі жылда 5 миллиард доллар деңгейіне жету үшін күш салуға дайын екендіктерін білдірді.

Түркия өкілдерінің айтуынша, өсу мүмкіндігі бар. Екі елдің де экспорттық құрылымдары мен бәсекеге қабілетті өнімдері ұқсас, бұл сыртқы нарықтарға жеткізуді кеңейту үшін жаңа мүмкіндіктер ашады.

Өзбекстандық экспорттаушылар үшін кедергілерді жоюға ерекше көңіл бөлінді. Электротехника, тоқыма және кабель өнеркәсібі өнімдеріне импорттық баж салығын төмендету, сондай-ақ көкөністер мен жемістердің жекелеген түрлерін әкелуге шектеулерді алып тастау мәселелері талқыланды.

Сонымен қатар, стандарттау және өнімнің сапасын бақылау саласындағы ынтымақтастық туралы келісімге қол жеткізілді. Түрік зертханалары Өзбекстанда тауарларды сертификаттау, сынау және тексеру қызметтерін көрсету үшін өкілдіктерін аша алады.

Түркияның Өзбекстан, Пәкістан, Әзірбайжан және Иранмен қол қойған жеңілдікті сауда келісімінің маңыздылығына да тоқталды. Бұл құжат тараптарға кедергілерді азайту және тауар айналымын арттыру үшін қосымша құралдар ұсынады.