Евразиялык экономикалык биримдиктин өлкөлөрүндө 2024-жылдын аягына чейин 6,6 миллион контрафакттык товар аныкталган. Интеллектуалдык менчик жаатында 1465 мыйзам бузуу катталган. Бул маалыматтар ЕЭК Коллегиясынын алдындагы Интеллектуалдык менчик боюнча консультативдик комитеттин отурумунда берилген 2024-жылга ЕАЭБ өлкөлөрүндө интеллектуалдык менчик укуктарын коргоо жаатында укук колдонуу практикасына мониторинг жүргүзүү боюнча отчетто чагылдырылган.

ЕЭКтин Экономика жана каржы саясаты боюнча министри Бахыт Султанов белгилегендей, массалык суроо-талаптагы товарлар көбүнчө жасалма жасалат.

"Антирейтингдин башында күнүмдүк товарлар: кийим-кече жана бут кийим, тиричилик техникасы, авто тетиктер, ошондой эле парфюмерия жана косметика турат. Булар мыйзам бузуучуларга эң аялуу категориялар", – деди ЕЭК министри.

Жолугушуунун катышуучулары ЕАЭБ алкагында интеллектуалдык менчик жаатындагы негизги демилгелерди талкуулашты. Интернетте мыйзам бузуулардын алдын алуу боюнча макулдашылган ыкмаларды иштеп чыгууга жана өнөр жай менчигинин объектилерин текшерүү боюнча издөө кызматын түзүүгө басым жасалды.

Бул чаралар 2025-жылга чейин Евразиялык экономикалык интеграцияны өнүктүрүүнүн стратегиялык багыттарын ишке ашыруу планынын бир бөлүгү болуп саналат жана бизнес жана керектөөчүлөр үчүн коопсуз жана ачык чөйрөнү түзүүгө багытталган.

Ошондой эле ИМ объектилеринин бирдиктүү бажы реестрин ишке киргизүү жана ЕАЭБде товардык белгилерди жана товарлардын чыккан жеринин аталыштарын каттоо тутумун киргизүү маселеси талкууланды.

Мындан тышкары, бажы органдары менен автордук укук ээлеринин ортосунда электрондук маалымат алмашууну уюштуруу жана автордук жана чектеш укуктарды жамааттык негизде башкаруунун тартиби жөнүндө макулдашууга өзгөртүүлөрдү киргизүү мүмкүнчүлүгү каралды.

11.09.2025 06:31:01