Кыргыз Республикасынын Министрлер Кабинетинин Төрагасы – Президенттин Аппаратынын Жетекчиси Адылбек Касымалиев кеңейтилген жыйындын алкагында министрлер кабинетинин үстүбүздөгү жылдын 4 айындагы ишмердүүлүгүнүн жыйынтыктары тууралуу маалымат берди.

Министрлер кабинетинин башчысы оң макроэкономикалык көрсөткүчтөрдү белгилеп, экономикалык өсүштүн жогорку темпи сакталып жатканын баса белгиледи.

"2025-жылдын төрт айынын жыйынтыгы боюнча ички дүң продукт (мындан ары – ИДП) 442,4 млрд сомду түздү. Экономиканын реалдуу өсүү темпи 11,7%ды түздү. ЕАЭБге мүчө мамлекеттердин ичинен Кыргызстан ИДПнын өсүү темпи боюнча эң жогорку көрсөткүчтөрдү көрсөтүп, биринчи орунда турат. Бул бардык тармактар боюнча оң көрсөткүчтөр менен камсыз болду", – деди ал.

Үстүбүздөгү жылдын январь-апрель айларында мамлекеттик бюджеттин ресурстары 264,9 млрд сомду түзүп, пландалган көрсөткүчтөн 14,6 млрд сомго көп болуп, план 105,8%га аткарылганын (бекитилген план 250,3 млрд сом) деп улантты Адылбек Касымалиев.

Мамлекеттик бюджеттин кирешеси 211,6 млрд сомду түзүп, план 106,3%га аткарылды. Өткөн жылдын ушул мезгилинин жыйынтыгы боюнча бул көрсөткүч 126,4 миллиард сомду түзгөн. Алсак, быйылкы жылы мамлекеттик бюджеттин кирешеси 85,1 миллиард сомго көбөйдү.

Мамлекеттик салык кызматынын кирешеси 89,8 млрд сомду түзүп, план 83,4 млрд сомду түзүп, план 107,6%га аткарылган. Бул өткөн жылдын ушул мезгилине салыштырмалуу 25,7 миллиард сомго көп.

Мамлекеттик бажы кызматынын жыйымдары 41,9 млрд сомду түзүп, план 101%га аткарылган. Бул өткөн жылдын тийиштүү мезгилине салыштырмалуу 2,2 миллиард сомго көп.

Министрлер кабинетинин башчысы ошондой эле быйыл эл аралык рейтинг агенттиктеринен Кыргыз Республикасына суверендүү кредиттик рейтингди алуу боюнча натыйжалуу чаралар көрүлгөндүгүн баса белгиледи. Тактап айтканда, март айында эл аралык S&P Global Ratings агенттиги Кыргыз Республикасына суверендүү кредиттик рейтингин “В+” деңгээлинде “Туруктуу” прогноз менен ыйгарган. Үстүбүздөгү жылдын апрель айында Fitch Ratings эл аралык агенттиги суверендүү кредиттик рейтингин “В” деп, ошондой эле “Туруктуу” прогноз менен берген.

Бул баалоо күчтүү макроэкономикалык көрсөткүчтөрдүн, мамлекеттик карыздын туруктуу деңгээлинин жана өлкөдөгү ийгиликтүү реформалардын негизинде жасалган.

Министрлер Кабинетинин Төрагасы Адылбек Касымалиев Экономика жана коммерция министрлигине, Каржы министрлигине жана Улуттук банкка өлкөнүн позициясын мындан ары бекемдөөнү камсыз кылууну жана тиешелүү жол картасын сунуштоо менен рейтингдик агенттиктер менен тыгыз кызматташууну уюштурууну тапшырды.