Президент Садыр Жапаров Кыргызстан элин 1-июнь Балдарды коргоонун эл аралык күнү менен куттуктады.

Мамлекет башчынын куттуктоосу:

«Урматтуу мекендештер!

Урматтуу балдар жана урматтуу ата-энелер!

Баарыныздарды жайдын биринчи күнү – Балдарды коргоонун эл аралык күнү менен чын дилимден куттуктайм!

Бул күн бейкапар жана бактылуу балалыкты өткөрүп жаткан балдарды коргоо жоопкерчилигибизди эскертет!

Эзелтен ата-бабаларыбыз: “Бала – бакыт, бала – байлык” деп, баланы береке, байлык, үмүт деп эсептеп, үй-бүлөдө баланын маанилүүлүгүн түшүнүп, аны бапестеп, мээримге бөлөп келишкен.

Бүгүнкү күндө өлкөбүздөгү ар бир ымыркай, ар бир бала, ар бир өспүрүм мээримге, камкордукка жана көңүл бурууга бөлөнүшү керек. Анткени, бала кезиндеги балдар үчүн сүйүү жана камкордук өзгөчө маанилүү!

Албетте, өлкөбүздө ар бир бала өзүн коопсуз сезип, дени сак, бакубат чөйрөдө чоңоюшу үчүн бардык аракеттер көрүлүүдө.

Акыркы жылдары балдарга карата зомбулуктун алдын алууга, билим берүү жана саламаттыкты сактоого жеткиликтүүлүктү кеңейтүүгө, балдарды колдоо системасын өнүктүрүүгө багытталган бир катар укуктук актылар кабыл алынган.

Учурдагы мамлекеттик саясаттын артыкчылыктары болуп ведомстволор аралык координацияны күчөтүү, аялуу балдарды каттоо системасын санариптештирүү, үй-бүлөгө жана коомчулукка багытталган профилактикалык программаларды жайылтуу кирет.

Аймактарда балдардын өнүгүүсүнө көмөк көрсөткөн бала бакчалардын, мектептердин, өнүктүрүү борборлорунун саны көбөйүп, инфраструктуралык колдоо системалуу түрдө жүргүзүлүүдө. Анткени биз ар бир баланын билим алууга, медициналык тейлөөгө жана коопсуз жашоого болгон укугун башкы приоритет катары эсептейбиз. Мындай аракеттер мамлекетибиздин келечегине болгон инвестиция.

Бул майрамда ата-энелерди куттуктап, аларга да кайрылгым келет. Балдарыбызга үлгү болуп, мээримин төгүп, максаттарына жетүүсүнө колдоо көрсөтүп, ар кандай кыйынчылыктардан сактоо биздин негизги милдетибиз.

Белгилей кетчү нерсе, эң камкор ата-эне дагы баланын өнүгүшү үчүн тийиштүү шарттарды жалгыз түзө албайт. Бул жерде үй-бүлө менен коомдун, үй-бүлө менен мамлекеттин тыгыз кызматташтыгы абдан маанилүү.

Эгерде үй-бүлө балага ата-энелик мээримин төгүп, татыктуу тарбия берсе, мамлекет балдарды коргоого тиешелүү шарттарды түзүп, алардын ар тараптуу өсүп-өнүгүшүнө, талантынын ачылышына коопсуз жана жагымдуу шарттарды түзөт.

Урматтуу балдар, силер мамлекетибиздин үмүтү жана жаркын келечегисиңер!

Жаркын балалыгыңар билимге болгон сүйүү жана башкаларды урматтоо менен коштолсун.

Тарбиялуу, билимдүү болуп чоңоюп, элиңе кызмат кыл!

Асманыңыз ар дайым ачык болсун!