2025-жылдын 13-июнунда Астана шаарында Кыргыз Республикасынын Тышкы иштер министринин биринчи орун басары Асеин Исаевдин жана Казакстан Республикасынын Тышкы иштер министринин орун басары Ермухамбет Конуспаевдин төрагалыгы алдында эки тараптуу кызматташуу жана аймактык өз ара аракеттенүү боюнча саясий консультациялар өттү.

Тараптар саясий, соода-экономикалык, суу-энергетикалык, транспорттук-транзиттик, маданий-гуманитардык жана башка тармактардагы кыргыз-казак мамилелеринин актуалдуу маселелерин кеңири талкуулашты. Ошондой эле эл аралык жана аймактык уюмдардын алкагында эки өлкөнүн өз ара аракеттенүүсү боюнча пикир алмашышты. Алар Кыргызстандын жарандарынын Казакстанда жүрүү шарттарына байланыштуу маселелерге токтолушту.

Ошону менен бирге Казакстан Республикасынын Президенти Касым-Жомарт Токаевдин Кыргыз Республикасына расмий сапарына даярдык көрүү маселелерине, ошондой эле Кыргызстан менен Казакстандын мамлекет, өкмөт башчыларынын жана тышкы иштер органдарынын деңгээлинде жетишилген макулдашууларды ишке ашыруу маселелерине өзгөчө көңүл бурулду.

Консультациялардын жыйынтыгында Казакстан Республикасынын Президенти К.Токаевдин Кыргыз Республикасына расмий сапарына даярдык көрүү боюнча Жол картасына кол коюлду.