Вице-премьер-министр, Суу чарба, айыл чарба жана кайра иштетүү өнөр жай министри Бакыт Төрөбаев Нарын облусуна болгон жумушчу сапарынын алкагында Ат-Башы районунда япониялык инвесторлордун колдоосу менен «Погранич Нур» кооперативи тарабынан ишке ашырылып жаткан чычырканак жана карагат плантацияларын отургузуу долбоору менен таанышты.

Долбоордун алкагында жапон инвесторлору 100 гектар аянтка чычырканак, карагат жана май өсүмдүктөрүн отургузууну пландаштырууда. Мындан тышкары, демилге балчылыкты өнүктүрүүнү карайт – жайыт жерлерге 150 бал челек орнотулат.

Долбоордун негизги максаты экологиялык таза продукцияны өнүктүрүү жана экспорттоо, жергиликтүү калктын иш менен камсыз болушуна көмөктөшүү, ошондой эле Кыргызстандан Япониянын рыногуна продукцияны кийин экспорттоо менен кыргыз-япон экономикалык жана маданий кызматташтыгын бекемдөө болуп саналат.