3-июлда Кыргыз Республикасынын Президенти Садыр Жапаров жана Азербайжан Республикасынын Президенти Илхам Алиев Агдам районундагы Хыдырлы айылындагы Айкөл Манас атындагы орто мектептин ачылыш аземине катышты.

Кыргызстан элинин атынан Азербайжанга белек катары курулган мектеп 528 окуучуга ылайыкталган. Өткөн жылдын март айында курулушу башталган объект толугу менен бүткөрүлдү. Билим берүү мекемеси 2,7 гектар аянтка курулган.

Заманбап имаратта үч окуу блогу, спорттук жана актовый зал, ашкана, китепкана, физика, химия жана биология лабораториялары, эки компьютердик кабинет, ошондой эле бардык керектүү окуу жана административдик жайлар бар. Коңшу аймакта футбол жана волейбол аянтчалары, эс алуу зоналары жана мектептен тышкаркы иш-чаралар үчүн инфраструктура бар.

Салтанаттуу иш-чара башталганга чейин президенттер Хыдырлы айылындагы калыбына келтирүү иштеринин жүрүшү менен таанышып, эки миң жер которгон адам үчүн курулган жаңы үйлөргө барышып, жаңы тургундарга ачкычтарды жеке тапшырышты.

Президент Илхам Алиев президент Садыр Жапаровго жана жалпы кыргыз элине Карабакты калыбына келтирүүгө көрсөткөн колдоосу үчүн чын жүрөктөн ыраазычылык билдирди. Ал мектепти куруу демилгеси жеке Садыр Жапаровго таандык экенин, учурда бул билим берүү мекемеси эки өлкөнүн боордоштугунун бекем символуна айланганын баса белгиледи.

Өз кезегинде президент Садыр Жапаров Айкөл Манас атындагы мектептин ачылышы тарыхый мааниге ээ окуя экенин белгиледи. Бул руханий байланыштарды бекемдеп, Кыргызстан менен Азербайжандын ортосундагы стратегиялык өнөктөштүктү мындан ары тереңдетүүгө шарт түзөт.

Мамлекет башчысы Агдам районундагы «Айкөл Манас» мектеби жана Бишкектеги Гейдар Алиев атындагы мектеп бир тууган эки элдин ортосундагы достуктун, өз ара урматтын символу жана ынтымак көпүрөсү экенин баса белгиледи.

Соңунда Хыдырлы айылынын тургундары өлкө башчысына жана Кыргызстандын элине тилектештиги, бир туугандык колдоосу жана келечегинин маанилүү бөлүгү болуп кала турган мектептин курулушуна баа жеткис жардамы үчүн терең ыраазычылык билдиришти.