Түркмөнстандын Элдик Маслахатинин төрагасы Гурбангулы Бердымухамедов коңшулар менен логистикалык кызматташтыкты активдештирүүгө чакырды. Ал Өзбекстанга чек арада логистикалык хаб түзүүнү, Казакстанга биргелешкен транспорттук-логистикалык компания түзүп, Каспий деңизиндеги порттор ортосундагы кызматташтыкты өнүктүрүүнү сунуштады.

Бул кадамдар эл аралык коридорлордун – биринчи кезекте Орусияны айланып өткөн Транскаспий жолу менен Орусиянын өзү үчүн маанилүү болгон Түндүк-Түштүк коридорунун потенциалын күчөтүшү керек.

Бердымухамедов 21-22-апрелде Казакстанга болгон иш сапарынын алкагында Түндүк-Түштүк кууру боюнча жүк агымынын өскөнүн белгилеп, Түркмөнбашы, Актау жана Курык портторун кеңейтүүгө чакырды. Ал эми Өзбекстандын президенти Шавкат Мирзиёев менен жолугушууда эл аралык транспорттук компанияларды жана каржы институттарын тартуу менен чек ара хабын түзүүнүн маанилүүлүгүн белгиледи.

Анын айтымында, Өзбекстан Түркмөнстандын портторуна Европанын рынокторуна чыгуучу жай катары ишене алат. Түркмөнстан Түркмөнбашы портун натыйжалуу пайдалануу боюнча олуттуу талкууларга даяр.

Сүрөт: Ачык булактар