Бишкекте Бүткүл дүйнөлүк азык-түлүк коопсуздугу күнүнө арналган “Тамак-аш азыктарынын коопсуздугу: илим аракетте” деген ураан алдында тегерек стол өттү.

Иш-чараны Саламаттыкты сактоо министрлигинин Оорулардын алдын алуу жана мамлекеттик санитардык-эпидемиологиялык көзөмөл департаменти М.Рыскулбеков атындагы Кыргыз экономикалык университети менен биргеликте уюштурган.

Иш-чарага мамлекеттик органдардын, эл аралык уюмдардын өкүлдөрү, ЖОЖдордун жана колледждердин окутуучулары, аспиранттар жана магистранттар, студенттер, ошондой эле билим берүү коомчулугунун жана бизнес түзүмдөрдүн өкүлдөрү катышты.

Тегерек столдун максаты – жашыл экономикага өтүү шартында тамак-аш өнөр жайына инновациялык технологияларды киргизүү маселелерин талкуулоо, ошондой эле тамак-аш азыктарынын сапатын жана коопсуздугун жогорулатууга, тамак-аштын калдыктарын минималдаштырууга жана айлана-чөйрөгө тийгизген таасирин төмөндөтүүгө багытталган туруктуу чечимдерди кароо. Катышуучулар тамак-аш продуктыларынын коопсуздугун камсыз кылууда бардык этаптарда – өндүрүштөн баштап керектөөгө чейин тармактык илимдин жетишкендиктерин колдонуунун маанилүүлүгүн белгилешти.

Мындай иш-чараларды өткөрүү дүйнөлүк стандарттарга жана келечек муундардын керектөөлөрүнө жооп берген туруктуу жана коопсуз тамак-аш системасын түзүүдө илимдин, бизнестин жана мамлекеттик органдардын күч-аракетин бириктирүүгө жардам берет.