2025-жылдын 30-майында “Манас” кинотеатрында Балдарды коргоонун эл аралык күнүнө арналган майрамдык иш-чара болуп өттү. Ага түрдүү социалдык топтордон 400дөн ашык бала катышты. Демилгечи жана уюштуруучу Эл аралык Гуд Нейборс уюмунун колдоосу менен Кыргыз Республикасынын Эмгек, социалдык коргоо жана миграция министрлиги болду.

Жыйындын катышуучуларына Эмгек, социалдык коргоо жана миграция министри Равшанбек Сабиров куттуктоо сөзү менен кайрылды. Ал өсүп келе жаткан муундарды коргоо жана колдоонун маанилүүлүгүн белгиледи:

"Ар бир бала бул дүйнөнүн жарыгы, үмүтү жана келечеги. Биз алардын балалыгын бактылуу жана коопсуз өткөрүүгө аракет кылабыз", – деп белгиледи министр.

Майрамдык программада анимациялык тасма көрсөтүлүп, балдарга балмуздак жана эстелик белектер тартууланды. Иш-чара жылуу маанайда өтүп, катышуучуларга кубаныч, жылмаюу жана унутулгус таасирлерди тартуулады.

Салтанатка Гуд Нейборс уюмунун Кыргызстандагы филиалынын директору Чо Сунхён да катышып, балдардын укуктарын коргоодо уюмдар аралык кызматташуунун маанилүүлүгүн баса белгиледи.