Бишкекте сатылып жаткан дарбыздардын курамында нитраттар нормалдуу чегинде. Бул тууралуу Суу чарба, айыл чарба жана кайра иштетүү өнөр жай министрлигинин ветеринардык кызматынын ветеринардык-санитардык экспертиза лабораториясынын адистери билдирди.

Маалыматка ылайык, дарбыздагы нитраттар 60 мг/кг болсо, ал коопсуз жана адамдын ден соолугуна зыяны жок деп эсептелет.

Учурда Өзбекстандан дарбыздар алынып келинип, күн сайын лабораториялык текшерүүдөн өтүүдө.

Адистер дарбыз менен катар башка жашылча-жемиштер да текшерилип жатканын белгилешет. Базарларга жана дүкөндөргө кирген продукциянын ар бир партиясы чыгарылган өлкөнү жана мурунку текшерүүлөрдүн натыйжаларын көрсөтүүчү тастыктоочу документке ээ болууга тийиш.

Бүгүнкү күндө республикада 78 ветеринардык-санитардык экспертиза лабораториясы иштейт, анын 13ү Бишкек шаарында. Бул мекемелер күн сайын азык-түлүк коопсуздугуна көз салып, калкты сапаттуу азык-түлүк менен камсыз кылууда.