Кыргызстанда кайра иштетүү тармагында туруктуу өсүш байкалууда. Бул тууралуу вице-премьер-министр, суу чарба, айыл чарба жана кайра иштетүү өнөр жай министри Бакыт Төрөбаев министрлик тарабынан уюштурулган «Агроөнөр жай комплексинин приоритеттүү тармактарына инвестиция тартуу» аттуу инвестициялык форумда билдирди.

Анын айтымында, бүгүнкү күндө Кыргызстандын продукциясы дүйнөнүн 80ден ашуун өлкөсүнө экспорттолот, ал эми экспорттук куржунунда 60тан ашык товар бар.

«2024-жылы жалпы экспорт дээрлик 39 миллиард сомду түзсө, быйылкы жылдын аягына чейин бул көрсөткүчтү 70 миллиард сомго жеткирүүнү пландап жатабыз», – деди Төрөбаев.

Бүгүн Бишкекте Суу чарба, айыл чарба жана кайра иштетүү өнөр жай министрлигинин демилгеси менен “WAPinvest 2025” форуму өтүүдө. Иш-чара өлкөнүн экспорттук потенциалын кеңейтүү жана айыл чарба тармагына инвестиция тартуу максатын көздөйт.