2025-жылдын 12-июлунда Чүй облусунун Ысык-Ата районунун Нурманбет айылында Чүй агро өнөр жай паркынын түзүлгөндүгүнүн урматына капсула салуу салтанаттуу аземи болуп өттү. Ири инвестициялык долбоорду «Кыргыз агрохолдинг» ААКсы ишке ашырууда.

Бул кадам Кыргызстандын агроөнөр жай потенциалын өнүктүрүү боюнча негизги долбоорлордун бири башталганын белгиледи. Иш-чарага мамлекеттик органдардын өкүлдөрү, инвесторлор, чет элдик өнөктөштөр жана жергиликтүү тургундар катышты.

Капсула суу чарба, айыл чарба жана кайра иштетүү өнөр жай министри Бакыт Төрөбаев тарабынан салынды.

"Бул ири долбоор президент Садыр Жапаровдун тапшырмасы менен ишке ашырылып жатат. Ал мамлекеттик саясаттын негизги багыттары: айыл чарбасын колдоо, агроөнөр жай комплексин модернизациялоо жана өлкөнүн азык-түлүк коопсуздугун камсыз кылуу менен шайкеш келет", – деп белгиледи ал.

Салтанаттын жүрүшүндө жалпы суммасы 24 миллион долларга эки маанилүү келишимге кол коюлду:

«Кыргыз агрохолдинг» ААКсы менен түштүк кореялык DOD Company компаниясы 12 миллион долларлык инвестициялык келишимге кол коюшту. Анда мал чарбачылыгын өнүктүрүү, агротехнологияларды киргизүү жана логистикалык инфраструктураны түзүү каралган.

12 миллион долларга экинчи келишимге “Кыргыз агрохолдинг” менен “Асыл тери” ишканасынын ортосунда кол коюлган. Анда суткасына 24 тонна сырье чыгаруучу булгаары заводун куруу, продукцияны экспорттоо жана жаңы жумушчу орундарды түзүү каралган.

Чүй агроөнөр жай паркын түзүү айыл чарбасына инвестиция тартууда, айыл чарба продукциясынын кошумча наркын жогорулатууда жана Кыргызстандын азык-түлүк коопсуздугун чыңдоодо маанилүү кадам болот.