Кыргызстанда 2023-жылдан тарта В гепатитине каршы эмдөө жүргүзүлүп келет.Бул тууралуу саламаттыкты сактоо министри Эркин Чечейбаев Жогорку Кеңештеги “Ата Журт Кыргызстан” фракциясынын жыйынында билдирди.

"Дарылоо профилактикага караганда эффективдүү эмес. Оорунун алдын алуунун эң маанилүү жолу бул эмдөө. Кыргызстанда 2023-жылы В гепатитине каршы эмдөө толук кандуу киргизилген. Бул эмнени билдирет? Азыркы балдар жана өспүрүмдөр бул вирус менен оорубайт. Ошондой эле вакцина ала элек улуу муундун өкүлдөрүн да жеткирүүгө аракет кылып жатабыз жана аларды ден соолукту чыңдоо мекемелерине чакырып жатабыз", – деди министр.

Ал белгилегендей, мамлекеттик лабораториялар жеке лабораториялардан артта калып жатат. Мына ошондуктан борборлоштурулган мамлекеттик лабораторияларды куруунун планы мындан беш жыл мурда иштелип чыккан, ал азыр ишке ашыруу стадиясында турат.

«Азия өнүктүрүү банкынын колдоосу менен 6 мамлекеттик лабораториянын жана 11 диагностикалык борбордун имараттары оңдоп-түзөөдөн өтүп, заманбап лабораториялык жабдыктар менен камсыздалып, кадрлар окутулуп жатат», – деп кошумчалады ал.