Дүйнөлүк банктын Аткаруу кеңеши Борбордук Азиядагы “Бирдиктүү ден-соолук” аймактык программасынын биринчи этабын каржылоого 60 миллион доллар бөлүүнү жактырды. Каржылоо Кыргыз Республикасына 30 миллион доллар жеңилдетилген насыя жана Тажикстанга 30 миллион доллар грантты камтыйт. Кошумчалай кетсек, ар бир өлкө Пандемия фондунан 1,79 миллион доллар грант алат.

Программа адамдардын, жаныбарлардын жана айлана-чөйрөнүн саламаттыгына карата артыкчылыктуу тобокелдиктерди алдын алуу, аныктоо жана аларга жооп кайтарууга багытталган. Ал аймактагы беш мамлекетти: Казакстан, Кыргызстан, Тажикстан, Түркмөнстан жана Өзбекстанды камтыйт жана 2025-2032-жылдар аралыгында ишке ашырылат.

Негизги багыттарга ветеринардык жана санитардык-эпидемиологиялык кызматтарды чыңдоо, санариптик платформаларды өнүктүрүү, адистерди окутуу, лабораторияларды модернизациялоо, жаныбарларды каттоо системасын түзүү кирет. ЦАРЭСтин базасында Алматыда катчылыгы менен «Бирдиктүү саламаттык» маселелери боюнча биринчи аймактык координациялык органды түзүү борбордук элемент болуп калат.

Аймак зооноздор, микробго каршы туруктуулук, кооптуу тамак-аш азыктары, жапайы жаныбарлардын миграциясы жана климаттын өзгөрүшүнүн таасири сыяктуу кыйынчылыктарга туш болууда. Программа өлкөлөргө коркунучтарга эффективдүү жооп кайтаруу үчүн саламаттыкты сактоо, айыл чарба жана экология секторлорунун ортосунда синергияны түзүүгө жардам берет.

Дүйнөлүк банктын Борбор Азия боюнча директору Татьяна Проскурякованын айтымында, жаңы программа «айыл чарбасынын атаандаштыкка жөндөмдүүлүгүн бекемдөөгө, сооданы кеңейтүүгө жана жаңы жумуш орундарын түзүүгө жардам берет».