Белгилүү өзбек ырчысы жана композитору, Өзбекстандын эл артисти Фаррух Закиров Орусиянын эң жогорку мамлекеттик сыйлыктарынын бири – «Достук» орденин алды. Ага сыйлыкты Россия Федерациясынын маданият министри Ольга Любимова Өзбекстан менен Россиянын ортосундагы Экономикалык кызматташтык боюнча өкмөттөр аралык комиссиянын Маданият боюнча кичи комиссиясынын бешинчи отурумунда тапшырды.

Салтанаттуу иш-чара Ташкентте 29-майда болуп, Өзбекстандагы «Орусиянын маданият күндөрү» масштабдуу программасынын бир бөлүгү болуп калды.

“Достук” ордени – Россиянын 1994-жылы негизделген мамлекеттик сыйлыгы, эл аралык кызматташтыкты, элдердин достугун чыңдоого өзгөчө сиңирген эмгеги үчүн, ошондой эле маданият, илим, экономика жана гуманитардык ишмердүүлүк сыяктуу тармактардагы мамилелерди өнүктүрүүгө кошкон салымы үчүн ыйгарылат.

Легендарлуу “Ялла” ансамблинин жетекчиси Фаррух Закиров ондогон жылдар бою Борбор Азия жана Россия элдеринин маданий биримдигинин символу болуп келген. Анын эмгеги чек аранын эки тарабында тең жогору бааланып, өлкөлөр ортосундагы маданий диалогго кошкон салымын баалоо кыйын.