КР Саламаттыкты сактоо министрлигинин Оорулардын алдын алуу жана мамлекеттик санитардык-эпидемиологиялык көзөмөл департаменти жыл башынан бери ичеги-карын ооруларына чалдыккандардын саны кыйла көбөйгөнүн билдирди. Алсак, 6348 учур катталды, бул 2024-жылдын ушул мезгилине салыштырмалуу 4610 учурга караганда 35,7%га көп. Ооруну жуктургандардын 81,6%ы 14 жашка чейинки балдар.

Ведомстводон билдиришкендей, оорунун туу чокусу адаттагыдай эле май-сентябрь айларында, эң жогорку чеги август айында болот. Негизги себеби – жеке гигиена эрежелерин сактабоо, бул өзгөчө балдар үчүн кооптуу.

Инфекциянын биринчи белгилери – алсыздык, баш оору, дене табынын көтөрүлүшү, кусуу, ичтин оорушу, кан жана былжыр аралашкан заңы.

Алдын алуу үчүн дааратканага баргандан кийин жана тамактанардын алдында колду самындап жакшылап жууп, жуулбаган жашылча-жемиштерди жебөө, көчөдөн тез бузулуучу азыктарды сатып алуудан алыс болуу зарыл. Тез бузулуучу азыктарды муздаткычта сактаңыз жана тамак-аштын чымындар менен байланышына жол бербеңиз.

Ичеги инфекциялары кусуу жана ич өткөктөн улам суусуздануу коркунучтуу. белгилери пайда болсо, дароо дарыгерге кайрылуу керек. Өзүн-өзү дарылоо абалын начарлатышы мүмкүн. Дарылоо жана ооруканага жаткыруу жөнүндө чечимди адис гана кабыл алат. Үй шартында дарылаганда башкаларга жукпоо үчүн алдын алуу чараларын көрүү зарыл.