Бүгүн Кыргыз Республикасынын Ички иштер министринин орун басары, милициянын генерал-майору Октябрь Урмамбетов Ысык-Көл облусунун аймагында браконьерликке каршы күрөшүү боюнча текшерүү жана рейддерди өткөрдү.

Генерал Урмамбетов милициянын өздүк курамына маалымат берип, негизги багыттарга токтолду:• мыйзамсыз балык уулоонун алдын алуу; • курчап турган чөйрөнү коргоо; • туристтик объекттерде коопсуздукту камсыз кылуу.

Курорттук сезонду утурлай курчап турган чөйрөнү коргоо жана коомдук тартипти сактоо боюнча президенттин жарлыктарын жана Ички иштер министрлигинин тапшырмаларын аткарууга өзгөчө көңүл бурулууда.

Министрдин орун басары браконьерликке каршы күрөш жана Ысык-Көлдү коргоо анын жеке көзөмөлүндө экенин жана сезон бою системалуу түрдө улантыларын белгиледи.

Ички иштер министрлиги июнь айынын башынан бери рейддердин жана тергөө-ыкчам иш-чараларынын жүрүшүндө тыюу салынган буюмдардын жана заттардын олуттуу көлөмү аныкталып, алынганын, анын ичинде жалпы узундугу 22 миң метрге жакын браконьердик торлор, кайыктар, ок атуучу куралдар жана ок-дарылар табылганын белгиледи. Буга чейин мыйзамсыз балык уулоо менен алектенген айрым адамдар мыйзамсыз аракеттерин токтотууга даяр экендиктерин билдиришип, кайыктарды, курал-жарактарды жана башка буюмдарды өз ыктыярлары менен укук коргоо органдарына өткөрүп беришкен.