Министрлер Кабинетинин Төрагасынын орун басары Эдил Байсалов Акыйкатчы институтунун натыйжалуулугун баалоочу эл аралык топтордун өкүлдөрү, ошондой эле Кыргыз Республикасынын Президентинин Аппаратындагы Жаңы Зеландиянын, Австралиянын, Мальдивдердин, Непалдын жана Швейцариянын белгилүү укук коргоочулары жана эксперттери менен жолугушту.

Эл аралык делегациянын иш сапары Кыргыз Республикасынын Акыйкатчы институтунун потенциалына комплекстүү баа берүү демилгесинин бир бөлүгү болуп саналат. Баалоо адам укуктары боюнча бул негизги улуттук органдын ишинин натыйжалуулугун жогорулатууга багытталган.

Жолугушуунун жүрүшүндө Акыйкатчы институтун институционалдык өнүктүрүү, анын адам укуктарын камсыздоо жана коргоо системасындагы ролу, ошондой эле мамлекеттик органдар жана жарандык коом институттары менен өз ара аракеттенүү маселелери талкууланды. Эл аралык стандарттарга жана алдыңкы дүйнөлүк тажрыйбага ылайык өлкөнүн адам укуктарын коргоо механизмдерин мындан ары чыңдоо зарылдыгына өзгөчө көңүл бурулду.

Эдил Байсалов көз карандысыз баа берүүнү жүргүзүүнүн маанилүүлүгүн белгилеп, анын жыйынтыктары жана сунуштары жарандардын укуктарын жана эркиндиктерин коргоонун улуттук тутумунун маанилүү элементи катары Акыйкатчы институтунун ишмердүүлүгүн мындан ары өркүндөтүүгө багытталган конкреттүү чечимдерди иштеп чыгуу үчүн негиз болуп берерине ишеним билдирди.

Тараптар Кыргыз Республикасында адам укуктарын коргоо институттарынын ишинин натыйжалуулугун жогорулатуу жана адам укуктарын илгерилетүү максатында кызматташууну бекемдөөгө өз ара умтулуусун ырасташты.