Синьцзян-Уйгур автономиялуу районунун Үрүмчү шаарындагы элдик куралдуу полиция күчтөрүнүн машыгуу базасында Sharp Blade 2025 снайперлердин эл аралык мелдеши өттү. Мелдешке 25тен ашык өлкөдөн 55тен ашык снайпердик команда катышты.

Сынак төрт номинация боюнча 12 дисциплинаны камтыды:

• негизги жогорку тактыктагы снайпердик атуу, • типтүү тактикалык кырдаалдарда атуу, • татаал күжүрмөн атуу, • алыскы аралыкка атуу.

Кыйын күрөштүн жыйынтыгында КР УКМКнын 9-кызматына караштуу «Калкан» атайын багыттагы отряды өлкө намысын татыктуу коргоп, жалпы командалык эсепте 3-орунду, жуптук эсепте 2-орунду ээледи. Команданын бир мүчөсүнүн жеке ийгилиги өзгөчө сыймыктануу менен шартталган: 9-кызматтын снайпери жеке биринчиликте биринчи орунду жеңип алып, Кыргызстандын атайын күчтөрүнүн кесиптик даярдыгынын жогорку деңгээлин тастыктады.

Кыргызстандын курама командасынын мындай абройлуу эл аралык мелдештерге катышуусу жана жетишкендиктери Кыргыз Республикасынын эл аралык аренадагы аброюн бекемдөөгө, күжүрмөн чеберчиликти өнүктүрүүгө жана дос мамлекеттердин атайын күчтөрүнүн өз ара аракеттенүү деңгээлин жогорулатууга өбөлгө түзөт.