Вена, 27-май, 2025-жыл – Караван Инфо маалымат агенттиги.Казакстандын делегациясы 2025-жылдын 19-майынан 23-майына чейин Венада өткөн БУУнун Кылмыштуулуктун алдын алуу жана жазык сот адилеттиги боюнча комиссиясынын 34-сессиясынын ишине активдүү катышты. Жалпы жыйында Казакстан Республикасынын Тышкы иштер министрлигинин өзгөчө тапшырмалар боюнча элчиси Станислав Василенко сөз сүйлөдү. Ал өз сөзүндө Казакстандын кылмыштуулукка жана терроризмге каршы күрөшүү боюнча эл аралык келишимдерге, анын ичинде БУУнун Коррупцияга каршы конвенциясына, Трансулуттук уюшкан кылмыштуулукка каршы конвенциясына жана анын протоколдоруна, ошондой эле терроризмге каршы күрөшүү боюнча бардык 19 эл аралык укуктук актыларга бекем берилгендигин баса белгиледи.

Баяндамада өзгөчө көңүл жаңжал болгон аймактардан кайтып келген жарандарды репатриациялоо жана реинтеграциялоо боюнча Казакстандын ийгиликтүү тажрыйбасына бурулду. Василенко «Жусан» жана «Руссафа» операцияларына кеңири токтолуп, анын алкагында 754 адам, анын ичинде аялдар жана балдар мекенине кайтарылган. Бул тажрыйба Казакстандын гуманитардык принциптерге берилгендигин жана чыр-чатактардын кесепеттери менен күрөшүүдөгү активдүү ролун көрсөтөт.

Станислав Василенко ошондой эле Казакстандын пенитенциардык системасын реформалоо тууралуу да айтып берди. Ал белгилегендей, акыркы он жыл ичинде Бириккен Улуттар Уюмунун Баңгизаттар жана кылмыштуулук боюнча башкармалыгынын (БУУ БКБ) жигердүү колдоосу менен Казакстан түрмөлөр системасын ырааттуу модернизациялап, аны эл аралык стандарттарга шайкеш келтирүүдө.

Кошумчалай кетсек, Комиссиянын ишинин алкагында Казакстандын делегациясы менен БУУнун БКБнын терроризмге каршы башкармалыгынын башчысы Роберто Арбитрионун жолугушуусу болуп өттү. Жолугушуунун жүрүшүндө тараптар мындан аркы кызматташуу жана түрдүү программалар, анын ичинде реабилитация, киберкылмыштуулук жана жазык сот адилеттиги системасын өркүндөтүү боюнча долбоорлор боюнча тажрыйба алмашуу маселелерин талкуулашты.

Сүрөт:Казакстан Республикасынын Тышкы иштер министрлиги