9-сентябрда Астанада Казакстан менен Түркиянын юстиция министрлеринин жолугушуусу болду. Тараптар эки өлкөнүн ортосундагы укуктук кызматташтыктын актуалдуу маселелерин талкуулашты.

Өзгөчө көңүл жарандык иштер боюнча юридикалык жардам көрсөтүүгө, соттун чечимдерин өз ара таанууга жана аткарууга, ошондой эле электрондук документ жүгүртүүнү өнүктүрүүгө бурулду. Атап айтканда, тараптар Казакстан менен Түркиянын ортосундагы жарандык иштер боюнча колдонуудагы келишимге өзгөртүүлөрдү киргизүү тууралуу Протоколдун долбоорун талкуулашты.

Мындан тышкары, казак тарап Түрк мамлекеттеринин юристтер биримдигин мындан ары өнүктүрүү боюнча бир катар демилгелерди сунуштады. Бул Түрк мамлекеттери уюмуна мүчө өлкөлөрдүн юристтеринин ортосундагы кызматташтыкты бекемдеп, жарандарга юридикалык жардам көрсөтүүнүн натыйжалуулугун жогорулатат.

Жолугушуунун жыйынтыгында министрлер конструктивдүү диалогду улантууга жана өз ара кызыкчылык туудурган бардык багыттар боюнча кызматташууну кеңейтүүгө макулдашышты.

Сүрөттө: Казакстан Республикасынын Юстиция министрлиги