Бишкек, 29-май, – «Караван Инфо» АА.Казакстандын коргоо министри генерал-полковник Руслан Жаксылыков Бишкекте өткөн Жамааттык коопсуздук келишим уюмуна (ЖККУ) мүчө-мамлекеттердин Коргоо министрлер кеңешинин жыйынына катышты.

Жыйынга ЖККУга мүчө-мамлекеттердин коргоо ведомстволорунун жетекчилери, уюмдун башкы катчысы Имангали Тасмагамбетов жана Бириккен штабдын башчысы, генерал-полковник Андрей Сердюков катышты. Катышуучулар Уюмдун жоопкерчилик чөйрөсүндөгү аскердик-саясий кырдаалды жана анын мүчө мамлекеттердин коопсуздугуна тийгизген таасирин талкуулашты.

Жыйында ЖККУнун жамааттык күчтөрүн башкарууну уюштурууну жакшыртууга багытталган документтер каралды. Коргоо ведомстволорунун жетекчилери 2026-2030-жылдарга аскердик кызматташтыкты өнүктүрүү планын макулдашышты. Бул документ Уюмдун аскердик бөлүгүн чыңдоого багытталган макулдашылган уюштуруучулук, техникалык жана практикалык чараларды ишке ашыруу максатында иштелип чыккан.

Мындан тышкары, ЖККУнун Коргоо министрлер кеңеши 2026-жылга ЖККУнун жамааттык коопсуздук системасынын күчтөрүн жана каражаттарын башкаруу органдарын жана түзүмдөрүн биргелешип даярдоо планын бекитти. Бул катышуучу-өлкөлөрдүн куралдуу күчтөрүнүн күжүрмөн даярдыгын жогорулатуу жана аракеттерин координациялоо боюнча системалуу иштерди көрсөтүп турат.

Ушул эле күнү ЖККУга мүчө-мамлекеттердин Коргоо министрлер кеңешинин катышуучуларын Кыргыз Республикасынын Президенти Садыр Жапаров кабыл алып, Кыргызстан төрагалык кылган мезгилде Уюмдун өнүгүүсү боюнча өз көз карашы менен бөлүштү.

Садыр Жапаров коопсуздукту чыңдоо, уюмга мүчө өлкөлөрдүн өз ара аракеттенүүсүн кеңейтүү жана жамааттык коргонуу механизмдеринин эффективдүүлүгүн жогорулатуунун артыкчылыктарын баса белгиледи. Соңунда коргоо ведомстволорунун жетекчилери Улуу Ата Мекендик согуштун баатырларынын элесине таазим этип, Жеңиш аянтындагы өчпөс отко гүл коюшту.

Сүрөт:МО РК