БОРБОР АЗИЯ, 3-май, 2025-жыл – Кербен маалыматы.Ооганстандын Убактылуу өкмөтү “Орусия – Ислам дүйнөсү: KazanForum 2025” эл аралык экономикалык форумуна катыша турган делегациянын курамын бекитти.

Делегацияны премьер-министрдин экономика боюнча биринчи орун басары Абдул Гани Барадар жетектейт. Делегациянын курамында өнөр жай жана соода министри Нуруддин Азизи, транспорт жана жарандык авиация министри Хамидулла Ахунзада да болот.

Кошумчалай кетсек, форумга Ооганстандан ири коммерциялык компаниялардын 35 жетекчиси катышат.

«Форумда ири келишимдерге кол коюлат: «Биринчи жолу ооган өндүрүшчүлөрүнүн көргөзмөсү өткөрүлөт», – деди «Татар-информ» агенттигине Россиянын Ооганстандагы бизнес борборунун жетекчиси Рустам Хабибуллин.

KazanForum жыл сайын Татарстандын борборунда Татарстан Республикасынын Президенти Рустам Миннихановдун жетекчилиги астында өткөрүлөт.

2024-жылы форумга 87 өлкөдөн 20 миңден ашык катышуучу келген. Форумдун темалары ислам банкинги, өнөктөштүк каржылоо, ишкердик, инвестиция, логистика жана адал жашоо образын камтыйт.

2025-жылы KazanForum 13-майдан 18-майга чейин өтөт.

Сүрөт: Караван Инфонун өнөктөштөрү