КР Эмгек, социалдык коргоо жана миграция министри Равшанбек Сабиров БУУнун Бүткүл дүйнөлүк азык-түлүк программасынын Кыргызстандагы өкүлү Кожиро Накай менен биргеликте мониторингдин алкагында Кемин районундагы Чым-Коргон айылында болуп, жүзүмдүн көчөттөрүн отургузуу долбоору менен таанышып, жергиликтүү тургундарга азык-түлүк пакеттери таратылды.

Жардам министрлер кабинети менен БУУнун Бүткүл дүйнөлүк азык-түлүк программасы (2023–2027) ортосундагы «Эмгек үчүн азык-түлүк» долбоору боюнча беш жылдык меморандумдун алкагында берилди. Айылда аз камсыз болгон жана муктаж болгон 79 долбоордун катышуучуларына ар бирине 300 кг ун жана 30 литрден өсүмдүк майы берилди.

Министр өз сөзүндө тургундардын активдүү катышуусу менен 25 гектар жерге 50 миң түп жүзүмдүн көчөттөрү отургузулганын белгиледи. Бул иш азык-түлүк жардамын гана бербестен, убактылуу жумуш орундарын түзүүгө, инфраструктураны жакшыртууга жана аймактын экономикалык потенциалын чыңдоого багытталган долбоордун алкагында ишке ашырылды.

2028-жылдын планында 13 гектар жерге мөмө-жемиш багын отургузуу, жүзүмзарларды кароону уюштуруу жана продукцияларды сатуу келечекте жергиликтүү бюджетке кошумча киреше алып келет.

«Бул ыкма бизге бир эле учурда бир нече маселелерди чечүүгө мүмкүндүк берет – калктын аялуу катмарын колдоо, жергиликтүү экономиканы өнүктүрүү жана айыл жамааттарынын туруктуулугун камсыз кылуу», – деп баса белгиледи Равшанбек Сабиров.

Кодзиро Накай Бүткүл дүйнөлүк азык-түлүк программасынын Кыргызстандагы азык-түлүк коопсуздугуна жана айыл аймактарын өнүктүрүүгө багытталган биргелешкен демилгелерди мындан ары да колдоого даяр экенин ырастады.