Көз карандысыз Мамлекеттер Шериктештигинин өлкөлөрүндө 550дөн ашык террористтик жана экстремисттик кылмыштардын алдын алып, 5,5 миңден ашуун террорист, экстремист жана жалданма күчтөр аныкталган. Бул тууралуу Орусиянын Федералдык коопсуздук кызматынын директору Александр Бортников Москвада өтүп жаткан КМШ өлкөлөрүнүн антитеррордук бөлүмдөрүнүн жетекчилеринин XVIII конференциясынын катышуучуларына куттуктоо сөзүндө билдирди.

Иш-чара КМШнын Антитеррордук борборунун (АТК) 25 жылдыгына арналган.

Маалыматка ылайык, былтыр эле терроризм жана экстремизм менен алектенген 1500дөн ашуун адам кылмыш жоопкерчилигине тартылган. КМШ АТКнын координациялоочу ролунун алкагында атайын кызматтардын өз ара аракеттенүүсүнүн эффективдүү системасы түзүлүп, коркунучтарга ыкчам жооп кайтарууга жана терроризмге каршы күрөштө олуттуу жыйынтыктарга жетишүүгө мүмкүндүк бергени белгиленген.

• Бортников ошондой эле мамлекеттер аралык издөө чөйрөсүндөгү ийгиликтерди баса белгиледи: КМШ АТКнын адистештирилген маалымат базасынын маалыматтык массивдеринин жардамы менен 900дөн ашык террористти кармоого мүмкүн болгон;
• Террордук ишмердүүлүктү каржылоого тиешеси бар 800дөн ашык адам аныкталган.

Анын айтымында, Шериктештикке кирген мамлекеттердин компетенттүү органдарынын ортосундагы кызматташуунун тажрыйбасы жана механизмдери трансулуттук коркунучтарга эффективдүү каршы турууга жана алгачкы этапта террористтик пландардын ишке ашуусуна бөгөт коюуга мүмкүндүк берет.