Көз карандысыз Мамлекеттер Шериктештигинин (КМШ) Өкмөт башчылар кеңешинин Дүйшөмбү шаарында өткөн жыйынында КМШнын волонтерлор форуму жөнүндө жобо расмий түрдө бекитилди. Бул тууралуу КМШнын Аткаруу комитетинин басма сөз кызматы билдирди.

Жобого ылайык, Форум тажрыйба алмашуу, волонтердук кыймылды өнүктүрүү жана эл аралык кызматташтыкты чыңдоо боюнча жыл сайын өтүүчү аянтча болуп калат. Иш-чараны уюштуруу КМШга мүчө мамлекеттердин Жаштар иштери боюнча кеңешине тапшырылды. Форум мамлекеттердин аталыштарынын орус алфавити менен аныкталган тартипте Шериктештиктин өлкөлөрүндө кезеги менен өткөрүлөт.

Форумду түзүү демилгесин Казакстандын президенти Касым-Жомарт Токаев 2023-жылдын октябрында КМШ мамлекет башчыларынын кеңешинин жыйынында сунуштаган. Жаштар иштери боюнча кеңеш бул сунушту колдоп, Форумду түзүү маселесин өкмөт башчыларынын кароосуна койду.

Форумдун негизги максаттарына КМШ өлкөлөрүнүн волонтердук уюмдарынын ортосунда диалог жана өз ара аракеттенүү үчүн аянтча түзүү, волонтерлордун коомдук турмушка катышуусун кеңейтүү, волонтердук ишмердүүлүктүн кадыр-баркын жогорулатуу жана бул жаатта ийгиликтүү долбоорлорду көрсөтүү кирет.