Кыргыз Республикасынын Экономика жана коммерция министри Бакыт Сыдыков «Элдик Банк» ААК жана «МФУ Ишкердикти өнүктүрүү фонду» ААК менен «Аялдардын ишкердигин өнүктүрүү» демилгесинин алкагында ишкер айымдарды жеңилдетилген насыялоо долбоорун ишке киргизүү жөнүндө келишимге кол койду.
 
Программа аймактардагы аялдардын бизнес демилгелерин туруктуу колдоого жана алардын финансылык ресурстарга жеткиликтүүлүгүн кеңейтүүгө багытталган.
 
Долбоор Азия өнүктүрүү банкы аркылуу Жакырчылыкты кыскартуу боюнча жапон фондунун каржылык колдоосу менен ишке ашырылууда. Каржылоо көлөмү кайтарымсыз грант түрүндө 40 миллион сомду түзөт.
 
Кыргызстандын аймактарында (Бишкек жана Ош шаарларынан тышкары) иштеген ишкер аялдарга жылдык 12%дан ашпаган үстөк менен 8 жылга чейинки мөөнөткө жеңилдетилген насыялар берилет.
 
Кол коюу аземинде сөз сүйлөгөн министр Бакыт Сыдыков программанын ишке кириши мамлекеттин аялдардын ишкердигин өнүктүрүү жана колдоо боюнча дагы бир маанилүү кадамы экенин баса белгиледи.
 
Долбоорду ишке ашыруу шарттары Кыргыз Республикасынын Министрлер Кабинетинин 2025-жылдын 14-февралындагы №81 буйругу менен бекитилген.