Жогорку Кеңештин төрагасы Нурланбек Тургунбек Армения Республикасына болгон расмий сапарынын алкагында Армениянын Улуттук Жыйынынын Төрагасы Ален Симонян менен жолугушту.

Алгач сүйлөшүүлөр чакан форматта өтүп, андан соң кеңейтилген жолугушуу болуп, анда эки тараптуу кызматташуунун актуалдуу маселелери талкууланды. Тараптар саясий, экономикалык, маданий-гуманитардык жана парламенттер аралык кызматташтыкты өнүктүрүүнүн келечеги тууралуу пикир алышты.

Төрага Нурланбек Тургунбек уулу Кыргызстан Армения менен ар тараптуу өнөктөштүктү өнүктүрүүгө кызыкдар экенин белгиледи.

«Көп жылдык байланыштарга негизделген эки тараптуу мамилелерди мындан ары да бекемдөө, ошондой эле эл аралык уюмдардын жана интеграциялык бирикмелердин алкагында кызматташууну өнүктүрүү зарыл», – деди ал.

Ошондой эле спикер кыргыз тарап Армения менен Азербайжандын ортосунда тынчтык келишимин түзүү аракеттерин колдой турганын белгиледи.

"Тиешелүү документке жакын арада кол коюлат деген үмүттөбүз. 1994-жылкы Бишкек протоколу боюнча тажрыйбасы бар Кыргызстан эки өлкөнүн сүйлөшүүлөрү үчүн аянтча түзүүгө даяр", – деп кошумчалады ал.

Мындан тышкары Нурланбек Тургунбек парламенттер аралык диалог мамлекеттер аралык мамилелерди өнүктүрүүнүн маанилүү фактору экенин белгиледи.

“Эки өлкөнүн парламенттери демократиянын жана саясий туруктуулуктун эң маанилүү инструменти болуп саналат жана биз тажрыйба алмашуу жана мыйзам долбоорлоо жаатында активдүү өз ара аракеттенүү аркылуу кыргыз-армян кызматташтыгын өнүктүрүүгө салым кошушубуз керек”, – деди ал.

Жолугушуунун жүрүшүндө соода-экономикалык мамилелерди өнүктүрүү маселелери да талкууланды.

— Бул тармактагы потенциалды толук пайдалана элекпиз. Кыргызстан биргелешкен долбоорлорду ишке ашырууга жана логистикалык байланыштарды жакшыртууга кызыкдар. «Биздин негизги рыноктор армян продукциясын Борбор Азия жана Кытайдын рынокторуна экспорттоо аянтчасы боло алат», – деп белгиледи төрага, ошондой эле маданий-гуманитардык кызматташтыкты өнүктүрүү боюнча өзүнүн сунуштары менен бөлүштү.

Өз кезегинде Армениянын Улуттук Жыйынынын Төрагасы Ален Симонян Жогорку Кеңештин төрагасынын расмий сапары эки өлкөнүн мамилесине жаңы дем берерине ишеним билдирди.

«Бизди тарыхый байланыштар бириктирип турат, парламенттер аралык диалогду бекемдөө аркылуу мамлекеттер аралык кызматташтыкты өнүктүрүү маанилүү», – деди ал.

Мындан тышкары, Ален Симонян Армения менен Азербайжандын ортосунда тынчтык келишимин түзүү боюнча сүйлөшүүлөр үчүн аянтча түзүү сунушу үчүн Кыргызстанга ыраазычылык билдирип, Кыргызстандын тажрыйбасын кайра колдонуунун маанилүүлүгүн белгиледи. Ал ошондой эле Кыргызстандын Тажикстан менен чек ара маселесин чечүүдөгү тажрыйбасын жакшы мисал катары белгиледи.

Сөзүнүн аягында Ален Симонян эки өлкөнүн гуманитардык байланышын чыңдоо максатында Арменияда Кыргызстандын маданият күндөрүн өткөрүү демилгесин көтөрдү.