Кыргызстандын Беларусь Республикасындагы элчилигинин колдоосу менен кыргыз-беларусь бизнес форумунун алкагында бизнес иш-чаралар өткөрүлдү. Бул тууралуу Тышкы иштер министрлигинин басма сөз кызматы билдирди.

Кыргызстандын делегациясы «Ягодка» фермасында, «Белплемживобединение», Минск No1 сүт заводунда жана Комаровский базарында болушуп, айыл чарба кооперациясын чыңдап, Кыргызстандын продукциясын уюштуруунун мүмкүнчүлүктөрүн изилдешти.

Ошондой эле Беларустун Айыл чарба жана тамак-аш министрлигинде, Мал чарбачылыгындагы маалыматтык системалар борборунда жана Беларустун Айыл чарба жана тамак-аш министрлигинин Мамлекеттик маалымат-коммуникациялык борборунда жолугушуулар өттү.

Мындан тышкары, «Кыргыз Агрохолдинг» ААКсы менен «Доброном» ЖАКсынын (Копеечка, Маяк жана Доброном дүкөндөр тармагы) ортосунда Кыргызстандын айыл чарба продукциясын жеткирүү боюнча сүйлөшүүлөр жүргүзүлүп, келишимге кол коюлду.

Айыл чарба, фармацевтика, тамак-аш жана жеңил өнөр жай тармагындагы биргелешкен долбоорлор талкууланып, алар боюнча бир катар иш-чаралар пландалууда.

Бул сапар Кыргызстан менен Беларустун ортосундагы соода-экономикалык кызматташтыкты чыңдоодо, өз ара пайдалуу өнөктөштүк мамилелерди өнүктүрүү үчүн жаңы мүмкүнчүлүктөрдү ачууда маанилүү кадам болду.